Crnogorski bokserski reprezentativac Tomislav Bato Đinović osvojio je srebrnu medalju na međunarodnom turniru “Mustafa Hajrulahanović Talijan” u Sarajevu. Član BK “Zlatičanin” je u finalu kategorije do 60 kilograma poražen od Ukrajinca Rasula Gulijeva, podijeljenom odlukom sudija. Meč je bio veoma izjednačen, sa dosta ritma i puno izmijenjenih udaraca, tako da su sudije, tek preglasavanjem dodijelile pobjedu Ukrajincu Gulijevu, nekadašnjem omladinskom šampionu Evrope. I da je Đinović proglašen pobjednikom ne bi bilo nezasluženo. Nijanse su odlučivale.
Pored Đinovića na turniru u Sarajevu, koji je okupio preko 120 boksera i bokserki iz 17 država Evrope i Azije nastupio je i mladi Viktor Dukić, koji je u polufinalu superteške kategorije, preko 90 kilograma poražen odlukom sudija od iskusnog Bugarina Roselina Bačevskog.
Bokserka Bojana Gojković je iskoristila turnir za sparing mečeve.
Boksere su na turniru ispratili selektor Nikola Ružić i treneri Momčilo Zlatičanin i Vladimir Dolhun.
BSCG